काठमाडौ, १ पुष । मङ्सिर २९ गते काठमाडौको गोकर्ण रिसोर्टमा प्रचण्डकी नातिनी प्रतिभा पाठकको विवाह थियो । त्यो विवाहको भब्यता र खर्च देखेर “प्रगतिशील विवाह” को बदनाम भैरहेको प्रतिक्रियाले सामाजिक सन्जाल रङ्गिएको छ ।
सामाजिक सन्जालमा देखिएका केही प्रतिनिधि प्रतिक्रिया यस्ता थिए –
डा. महेन्द्र सापकोटा (उपप्राध्यापक, त्रिभुवन विश्वविद्यालय) – तथाकथित क्रान्तिकारिताको समाजशास्त्र र पाँच तारेको विहेबारिताको अर्थशास्त्र कुन सिद्धान्तमा पर्दछ ??
अधिवक्ता विमल पोख्रेल – गंगा दाहालले बालुवाटार बसेर पैसा नउठाइकन प्रचण्डककी नातिनी तथा रेणु दाहालकी छोरी प्रतिभा पाठकको करोडौंको विवाह गर्ने कुनै सम्भावना थिएन । अमरेशकुमारले लगाएको आरोप पुष्टि भइसकेको छ । थप प्रमाण आवश्यक छैन । करोडौंको विवाह नै सबैभन्दा ठूलो प्रमाण हो । प्रचण्डले बालुवाटारलाई लुटको अखडा बनाएका छन् । माओवादी साथीहरू, दाहाललाई पार्टी र सरकारको सत्ताबाट खसाल्न ढिलाइ भइसकेको छ ।
पत्रकार राम सुवेदी – देख्यौ नि माक्र्सवादी हो, जनबादी ब्या ? तेरा महान् अक्टाेवर क्रान्ति !!!
छन्द पहराई नेता नेपाली काङ्ग्रेस (गुल्मी) – यसलाई प्रचण्डपथ विवाह भन्दो रहेछ ।
जनकपौडेल रेशम (प्रवास, भारत) – विगतका कुरा त छोडौं माओबादी जनयुद्ध जनवादीक्रान्ती को लागि थिएन नै । विध्वंस मच्चाउदै यही सामन्ती संरचना सहितको संसदिय प्रणाली वा सत्तामा आउनको लागि नै थियो । त्यसमा माओबादी सफल पनि भयो। धेरै पहिला सर्वहारा बर्गिय चिन्तन र मार्क्सबादका आधारभुत सिद्धान्तहरु बाट च्युत भैसकेको पार्टी मा सर्वहारा सांस्कृतिक विचलन स्वत: बुझ्न सकिन्छ। रुपान्तरणको कुनै साईनो रहने कुरा भएन। जब आफु नै त्यस बाट विचलित भैसके पछि प्रेरितका कुरा पनि टाढाका भए। त्यसैले भन्नु र सयमा पाँच प्रतिशत भए पनि व्यवहार मा उतार्नु सक्नु गाह्रो छ। अरुलाई मात्र होईन हामी आफै लाई पनि यो प्रश्न खडा हुँदै आएको छैन र!
कवि बिक्रम रानाले कवितात्मक शैलीमा भावना पोखेकाछन् – माफ गर्नुहोला बधाई दिन सकियन…..! मुख्यत !हिजोको युद्ध समाजमा बिद्धमान कुरिती, कुसंस्कार, कुपर्था उचनिच भेदभाव छुवाछूत र सबैभन्दा धेरै त धनी र गरिव बिचको असमानताको पर्खाल भत्काउन थियो! त्यसैले होला मार्क्सवाद लेनिनवाद र दर्शनका ठुलाठुला ठेली पढन र बुझ्न नसक्नेहरु पनि हासी हासी माओवादी बनेर मर्न तयार भयका थिए ! सायद सर्बहारा बर्गको आस्थाको धरोहर होचा निमुखा लाटा सोझा श्रमिक मजदुर र किशानको प्रतिनिधि पार्टी र त्यस्को सर्बोच्च नेताको हिजोका राणा राजा र पन्चलाइ समेत माथ खुवाउने गरि यो तामझाम तडकभडकपुर्ण उल्टो रुपान्तरण हुन्छ रगत पशिना आँसुको जगमा आयको यो समग्र परिवर्तनको नेतृत्वकर्ताको परिवारवाद नाताबाद कृपावाद समग्रमा वर्गसमन्वय र वर्गउत्थानबादले प्रचण्डपथको नया पगरी लगाउछ भन्ने लागेको भय कोहि पनि नेता कार्यकर्ताले माओवादी बन्ने जोखिपुर्ण बाटो रोज्थेन होला आखिर घुमिफिरी उहि जदौ मालिक गर्ने त रहेछ….. !!
दीपक पौडेल, नेकपा (मशाल) रुपन्देहीका नेता – दलाल संसदीय व्यवस्थाका नायक, प्रधानमन्त्री प्रचण्डको नातीनीको विवाह हो । यत्तिको त हुनै पर्यो । क्रान्तिकारी कम्युनिस्ट पार्टीको नेतालाई जस्तो के को बिरोध ?? विरोधमा कुनै दम छैन !
लेखनाथ न्यौपाने (नेता, नेकपा माओवादी केन्द्र) – लुम्बिनी विकास कोषको नियुक्तिबाट शुरु भएको रुपान्तरण अभियान गोकर्ण रिसोर्टमा पुगेर समापन !
नवीन खड्का (क्रान्तिकारी कम्युनिस्ट पार्टी नेपाल) का युवा नेता – माओवादी केन्द्रको वडा वडाबाट सुरु भएको रुपान्तरण अभियान पाचतारे होटेलमा एक समारोहका बीच समापन्!!
रामबहादुर बुढा, नेकपा (मशाल) प्रवक्ता – समाज सुधार ऐनमा ५० जनासम्म जन्ती भने जस्तो लाग्थ्यो ।
जनमेल लेख्छ – प्रचण्डकी नातिनीको बिहे – सन्दर्भ : क्रान्तिकारी भनिएका /ठानिएका मोहन वैद्यको पार्टीका सचिवालय सदस्यको परिवारकी सदस्य (छोरी) बिहे–भोजभतेर सोल्टी होटलमा हुन्छ भने संसदीय व्यवस्था स्वीकार गरेर, अमेरिकी साम्राज्यवादका् काखमा लुटपुटिएका नव–प्रतिक्रियावादी कित्ताका प्रचण्डले नातिनीको बिहे गोकर्ण रिसोर्ट गरे भनेर टिप्पणी गर्नुको अर्थ छैन । यो त वर्गदुस्मनलाई कसरी हेर्ने र बुझ्ने भन्ने कुरा हो । तर कठै विप्लव बाबुसाहेब पनि अहिले प्रचण्डकै काखमा लुटपुटिन पुगेका छन् । हेर्दै जाऔँ कित्ता कसरी प्रस्टिन्छ, ध्रुविकरण कसरी हुँदै जान्छ ।
नरेन्द्र जङग पिटर (नेकपा माओवादीको पूर्ब केन्द्रीय सल्लाहकार एवम हाल स्वतन्त्र वामपन्थी लेखक ) – “अध्यक्ष प्रचण्ड, तपाईंले गोकर्ण रिसोर्टमा नातिनीको तामझाम प्रदर्शन विवाह आयोजन गरेर गलत सन्देश दिनु भो, गलत गर्नु भो । पार्टी सुप्रिमोको हैसियतले, प्रधानमन्त्रीको हैसियतले, जनयुद्धको पहिलो पंग्तीको सबभन्दा अगुवा कमाण्डर, परिकल्पनाकारको हैसियतले गोकर्णबाट दिन खोज्नु भएको सांस्कृतिक र सामाजिक सन्देश गलत छन । समयको चयन अझ गलत छ । जाजरकोट र रुकुममा देशले ब्यहोरिरहेको प्राकृतिक विपत, तराईमा सितलहरको चिसोले कठ्याङ्गृएर मृत्यूबरन, कार्यकर्ताहरू रूपान्तरणमा देशव्यापी खटिरहेको अवस्था, विराधी र दुश्मनको घेराबन्दीमा परिरहेको अवस्था, आम जनतामा राजनीति प्रति निराशा र वितृष्णा पलाइरहेको अवस्था, नेताप्रति आक्रोशका अनेकौं रुप र चरित्र सडकमै छताछुल्ल भएको अवस्थामा गोकर्णको कलाविहीन नाटकले तपाईँलाई दीर्घकालीन असर परिरहनेछ । तपाई स्वयंले आलोचना, विरोध र उछितो खन्ने शीर्षक दिनुभयो । जनयुद्धले नेपाली जनतालाई प्रशिक्षित गरेको विषय-कसले के भन्छ भन्दा पनि कसले के गर्छ ? कथ्यलाई तथ्य र तर्कसँग जोडेर अनिमात्रै विश्वास गर भन्ने हो । अभिजातको सूकृति, सोच र सौन्दर्यलाई जुनदिन कम्युनिष्टले आत्मसात गर्छ त्यसदिनदेखि नै उ पतनको बाटो समात्छ भन्ने हो । अरुले कम्युनिष्टलाई ध्वस्त गर्नै सक्दैनन, आफूले गर्ने ध्वस्ततालाई बचाउने कुनै महाङ्काल भगवान आई पुग्नेछैनन,पशु पति त टुलुटुलु हेरिरहनेछ । पशुपतिले राजतन्त्र बचाएन । अभिजातको नक्कल गर्ने बित्तिकै अभिजातले तपाईलाई आत्मसात गर्दैनन । तपाईँका निम्त्यालु र भतेरे नै अहिले आलोचक बनेर देखाइसकिए । भन्नुस् त अध्यक्षज्यू-गोकर्णबाट दिन चाहनुभएको राजनीतिक, गर्दैन आर्थिक, कूटनीतिक, सामाजिक र सांस्कृतिक सन्देश के हो ?”
Comments