बेङ्गलोर। अखिल भारत नेपाली एकता समाज बेङ्गलोर दक्षिण नगर समितिको आयोजनामा सञ्चालित २०८३ सालको चारदिने प्रगतिशील देउसीभैलो कार्यक्रम भव्य तथा उत्साहपूर्ण वातावरणमा सम्पन्न भएको छ। प्रवासमा रहेका नेपाली श्रमिक तथा सर्वसाधारण जनसमुदायबीच आपसी एकता, सामाजिक सद्भाव, सांस्कृतिक चेतना र प्रगतिशील विचारको प्रचार–प्रसार गर्ने उद्देश्यले सञ्चालन गरिएको उक्त कार्यक्रमको समापन १५ नोभेम्बर २०२६ का दिन विशेष समारोहबीच गरिएको हो।समापन कार्यक्रमको अध्यक्षता समितिका अध्यक्ष राम दत्त पाण्डेयले गर्नुभएको थियो भने सञ्चालन नगर सचिव हरिश बि।क।ले गर्नुभएको थियो।
कार्यक्रममा प्रमुख अतिथिका रूपमा अखिल भारत नेपाली एकता समाजका केन्द्रीय उपाध्यक्ष किसन बहादुर बि।क। उपस्थित हुनुहुन्थ्यो। त्यसैगरी केन्द्रीय सचिव रामसिंह बि।क।, केन्द्रीय सदस्यहरू धर्म राम बि।क।, गणेश बि.क. शेरसिंह बि.क. तथा महिला केन्द्रीय सदस्य मिना बि.क.को आतिथ्यता रहेको थियो।
त्यस्तै अखिल भारत नेपाली विद्यार्थी संघकी प्रतिभा बि.क., नेपाली समाज भारतका केन्द्रीय सदस्य दीपक बि.क., दक्षिण भारत क्षेत्रीय सदस्यहरू शिव राम बि.क., द्रोपती बि.क., वसन्ती बि.क., राजेन्द्र बि.क., वीरेन्द्र बि.क., अरुणा बि.क. जनक बिक., अर्जुन टमटा, सुन्दरी कोली, नेपाली समाज भारत कर्नाटक राज्य समितिकी सदस्य दीपा बि.क., स्याम बहादुर परियार, रक्तिम सांस्कृतिक अभियानका नगर अध्यक्ष बोम बहादुर परियार तथा अखिल भारत नेपाली एकता समाज विद्यार्थी संघकी सदस्य एवं रक्तिम सांस्कृतिक अभियानकी कलाकार सरिता बि.क. र विद्यार्थी संघकी सदस्य तथा रक्तिम सांस्कृतिक अभियानकी कलाकार बिन्दु बिकलगायत विभिन्न संगठनका प्रतिनिधि तथा सामाजिक व्यक्तित्वहरूको आतिथ्यता रहेको थियो।
कार्यक्रममा उपस्थित अतिथिहरूको आसन ग्रहणपछि देश र जनताको मुक्तिका निम्ति आफ्नो अमूल्य जीवन उत्सर्ग गर्ने सम्पूर्ण ज्ञात–अज्ञात सहिदहरूप्रति सम्मान व्यक्त गर्दै एक मिनेट मौनधारण गरिएको थियो।मौनधारणपश्चात् अर्जुन भाटले उपस्थित जनसमुदायलाई शब्दद्वारा स्वागत गर्नुभएको थियो भने रक्तिम सांस्कृतिक अभियानका कलाकारहरूले प्रगतिशील गीत तथा सांस्कृतिक प्रस्तुतिमार्फत स्वागत गर्नुभएको थियो। कलाकारहरूको प्रस्तुतिले कार्यक्रममा उत्साह थप्नुका साथै नेपाली मौलिक संस्कृति र प्रगतिशील चेतनाको सुन्दर संयोजन प्रस्तुत गरेको थियो।
कार्यक्रमका प्रमुख अतिथि तथा अखिल भारत नेपाली एकता समाजका केन्द्रीय उपाध्यक्ष किसन बहादुर बि।क।ले शुभकामना मन्तव्य राख्दै सर्वप्रथम आफूलाई प्रमुख अतिथिका रूपमा आमन्त्रण गरी विचार राख्ने अवसर प्रदान गरेकोमा आयोजक बेङ्गलोर दक्षिण नगर समितिप्रति हार्दिक धन्यवाद व्यक्त गर्नुभयो।
आफ्नो मन्तव्यमा उहाँले प्रगतिशील देउसीभैलोको सांस्कृतिक, सामाजिक र राजनीतिक महत्वमाथि प्रकाश पार्दै भन्नुभयो—
“आदरणीय अध्यक्षज्यू, मञ्चासीन अतिथिगण, संगठनका जिम्मेवार साथीहरू तथा उपस्थित सम्पूर्ण नेपाली दाजुभाइ तथा दिदीबहिनीहरू
आज हामी यहाँ केवल एउटा देउसीभैलो कार्यक्रमको समापन गर्न भेला भएका होइनौँ। हामीले हाम्रो भाषा, संस्कृति, परम्परा, सामाजिक एकता र प्रगतिशील विचारलाई जनतासम्म पुर्याउने एउटा महत्वपूर्ण अभियानको समीक्षा गर्न यहाँ उपस्थित भएका छौँ।
देउसीभैलो हाम्रो नेपाली समाजको मौलिक सांस्कृतिक पहिचान हो। यो हाम्रो पुर्खाले हस्तान्तरण गरेको सांस्कृतिक सम्पत्ति हो। तर संस्कृतिको नाममा पुराना विकृति, अन्धविश्वास, रूढिवादी सोच र सामाजिक विभेदलाई निरन्तरता दिनु हाम्रो उद्देश्य होइन।
हाम्रो उद्देश्य संस्कृतिको संरक्षण गर्नु हो, तर संस्कृतिको नाममा हुने शोषण र विभेदको संरक्षण गर्नु होइन। हाम्रो उद्देश्य परम्परालाई निरन्तरता दिनु हो, तर समाजलाई पछाडि धकेल्ने गलत परम्परालाई बोकेर हिँड्नु होइन।त्यसैले हामीले प्रगतिशील देउसीभैलोको अवधारणा अगाडि सारेका छौँ।
हामी गीत गाउँछौँ, नाच्छौँ, रमाउँछौँ, तर त्यससँगै समाजलाई सचेत बनाउने सन्देश पनि दिन्छौँ। हामी मनोरञ्जन गर्छौँ, तर त्यस मनोरञ्जनभित्र सामाजिक परिवर्तनको चेतना पनि मिसाउँछौँ। हामी संस्कृतिको उत्सव मनाउँछौँ, तर त्यससँगै समानता, न्याय, स्वतन्त्रता र सामाजिक एकताको पक्षमा आवाज पनि उठाउँछौँ।
देउसीभैलो केवल आर्थिक सहयोग सङ्कलन गर्ने माध्यम मात्र होइन। यो जनतासँग जोडिने, जनताको घरदैलोमा पुग्ने, उनीहरूका दुःख–सुख बुझ्ने र प्रवासी नेपालीहरूबीच आपसी सम्बन्ध तथा एकतालाई बलियो बनाउने महत्वपूर्ण सामाजिक तथा सांस्कृतिक अभियान पनि हो।
आदरणीय दाजुभाइ तथा दिदीबहिनीहरू१
हामी सबैको जीवनका आ–आफ्नै कथा छन्। कोही परिवारको उज्ज्वल भविष्य खोज्दै आफ्नो जन्मभूमि छोडेर भारत आएका छौँ। कोही छोराछोरीको शिक्षाका लागि पसिना बगाइरहेका छौँ। कोही वृद्ध आमाबुबाको सहारा बन्न आफ्नो जवानी खर्चिरहेका छौँ।
हामीमध्ये धेरैका सपना गाउँमा छुटेका छन्, परिवार नेपालमा छुटेको छ, तर हाम्रो श्रम र पसिना यहाँको भूमिमा बगिरहेको छ।
हामी दिनभरि कारखाना, होटल, निर्माण क्षेत्र, कम्पनी तथा विभिन्न श्रम क्षेत्रमा काम गर्छौँ। दिनभरको थकित शरीर लिएर साँझ कोठामा फर्कन्छौँ। कतिपय अवस्थामा आफ्ना पीडा सुनाउने मान्छेसमेत हुँदैन। तर पनि हामी परिवारको खुसी, छोराछोरीको भविष्य र घरपरिवारको जिम्मेवारी पूरा गर्न निरन्तर संघर्ष गरिरहेका हुन्छौँ।
यस्तो अवस्थामा हाम्रो संगठनले एउटा महत्वपूर्ण जिम्मेवारी बोकेको छ।
त्यो जिम्मेवारी भनेको प्रवासी नेपालीहरूलाई केवल संगठनको सदस्य बनाउनु मात्र होइन, उनीहरूका दुःख–सुखमा साथ दिने, अन्याय र शोषणविरुद्ध आवाज उठाउने, अधिकारका लागि सचेत बनाउने तथा आपसी एकताको सूत्रमा बाँध्ने हो।
हामीले बुझ्नुपर्छ, एक्लो मान्छेको आवाज कमजोर हुन सक्छ, तर हजारौँ श्रमिकको एकताबद्ध आवाजलाई कसैले सजिलै दबाउन सक्दैन।
त्यसैले म सम्पूर्ण नेपाली दाजुभाइ तथा दिदीबहिनीहरूलाई आग्रह गर्न चाहन्छु—हामी जहाँ रहे पनि, जुनसुकै क्षेत्रमा काम गरे पनि हाम्रो आपसी एकता, सहकार्य र संगठनात्मक सम्बन्धलाई कमजोर नबनाऔँ। सुखमा मात्र होइन, दुःख र अप्ठ्यारो परिस्थितिमा पनि एकअर्काको साथ दिऔँ।
हामी श्रमिक हौँ, हामी मेहनतकश हौँ। समाज र देश निर्माणका वास्तविक आधार हामी नै हौँ। हाम्रो श्रमको सम्मान हुनुपर्छ, हाम्रो अधिकारको सुनिश्चितता हुनुपर्छ र हाम्रो आत्मसम्मानको रक्षा हुनुपर्छ।
हामीले अर्को महत्वपूर्ण कुरा पनि बुझ्न आवश्यक छ। प्रवासमा रहनुको अर्थ आफ्नो जन्मभूमि, भाषा, संस्कृति र पहिचानलाई बिर्सनु होइन। हामीले जहाँ रहे पनि आफ्नो भाषा, कला, साहित्य र संस्कृतिको संरक्षण गर्नुपर्छ। नयाँ पुस्तालाई आफ्नो इतिहास, पहिचान र सांस्कृतिक मूल्यसँग जोड्नुपर्छ।
तर संस्कृति जोगाउने नाममा समाजमा विद्यमान विभेद, छुवाछुत, लैङ्गिक असमानता, अन्धविश्वास र कुरीतिलाई निरन्तरता दिनु हुँदैन। हाम्रो संस्कृति सबै जाति, भाषा, लिङ्ग र समुदायलाई समान सम्मान दिने संस्कृतिका रूपमा विकास हुनुपर्छ।
आजको यो प्रगतिशील देउसीभैलो कार्यक्रम सफल बनाउन चार दिनसम्म विभिन्न ठाउँमा पुगेर आफ्नो अमूल्य समय, श्रम, कला र प्रतिभा खर्च गर्नुहुने सम्पूर्ण कलाकार, सांस्कृतिककर्मी, संगठनका जिम्मेवार साथीहरू तथा सहयोगी जनसमुदायप्रति म केन्द्रीय समितिको तर्फबाट हार्दिक धन्यवाद व्यक्त गर्न चाहन्छु।
विशेषगरी नेपाली मजदुरहरूको घरदैलोमा पुगेर हाम्रो संगठनको विचार, उद्देश्य र सांस्कृतिक सन्देश पुर्याउने सम्पूर्ण साथीहरूको योगदान प्रशंसनीय छ। तपाईंहरूको मेहनत, सक्रियता र समर्पणले नै यस्ता कार्यक्रमहरू सफल हुन्छन्।
अन्त्यमा, २०८३ सालको प्रगतिशील देउसीभैलो कार्यक्रममा प्रत्यक्ष तथा अप्रत्यक्ष रूपमा सहयोग गर्नुहुने सम्पूर्ण नेपाली दाजुभाइ तथा दिदीबहिनीहरूको जीवनमा सुख, शान्ति, समृद्धि, प्रगति र सुस्वास्थ्यको हार्दिक शुभकामना व्यक्त गर्दछु भन्नुहुँदै हाम्रो एकता अझ बलियो बनोस्, हाम्रो संगठन अझ सशक्त बनोस् र प्रवासी नेपालीहरूको हक, हित तथा अधिकारका पक्षमा हाम्रो आवाज अझ बुलन्द हुँदै जाओस् भन्नु भयो आफ्नो मन्तव्यमा प्रगतिशील देउसीभैलोको महत्व, प्रवासी नेपाली श्रमिकहरूको अवस्था, संगठनात्मक एकताको आवश्यकता तथा सांस्कृतिक रूपान्तरणको विषयलाई जोडदार रूपमा प्रस्तुत गर्दै कार्यक्रमको सफलताका लागि शुभकामना व्यक्त गर्नुभएको थियो।
चार दिनसम्म सञ्चालन गरिएको यस अभियानले बेङ्गलोरमा कार्यरत नेपाली श्रमिक तथा सर्वसाधारण नेपाली समुदायसँग प्रत्यक्ष सम्बन्ध स्थापित गर्न महत्वपूर्ण भूमिका खेलेको छ। विभिन्न स्थानमा रहेका नेपालीहरूको घरदैलोमा पुगेर तिहारको शुभकामना आदानप्रदान गर्नुका साथै संगठनको उद्देश्य, विचार र सामाजिक भूमिकाबारे जानकारी गराइएको थियो।यस अभियानले प्रवासमा रहेका नेपालीहरूबीच आपसी सद्भाव, सहयोग, सहकार्य र संगठनात्मक एकतालाई थप मजबुत बनाउन सहयोग पुर्याएको छ। साथै प्रगतिशील गीत, संगीत र सांस्कृतिक प्रस्तुतिमार्फत सामाजिक चेतना फैलाउने प्रयाससमेत गरिएको थियो।
कार्यक्रमको सफलताले प्रवासी नेपाली समुदायबीच संगठनप्रतिको विश्वास, आत्मीयता र सहकार्यको भावना अभिवृद्धि गर्न सकारात्मक योगदान पुर्याएको आयोजक समितिको निष्कर्ष रहेको छ।
अन्त्यमा कार्यक्रमका सभाध्यक्ष राम दत्त पाण्डेयले उपस्थित सम्पूर्ण अतिथि, कलाकार, सहयोगी तथा जनसमुदायप्रति आभार व्यक्त गर्दै आगामी दिनमा पनि यस्ता रचनात्मक, प्रगतिशील तथा जनमुखी कार्यक्रमलाई निरन्तरता दिने प्रतिबद्धता व्यक्त गर्नुभयो।यसरी अखिल भारत नेपाली एकता समाज बेङ्गलोर दक्षिण नगर समितिद्वारा आयोजित २०८३ सालको प्रगतिशील देउसीभैलो कार्यक्रम उत्साहपूर्ण वातावरणमा सम्पन्न भएको थियो।

