किसनबहादुर वि.क.
बन्दुकको गोलीले मानिसको शरीरमा चोट पुर्याउँछ, तर विचारको गोलीले मानिसको चेतना, सोचाइ र दृष्टिकोणलाई नै परिवर्तन गर्न सक्छ। बन्दुकको गोलीले एउटा व्यक्तिको जीवन समाप्त गर्न सक्छ, तर विचारको शक्तिले हजारौँ मानिसको मनमा नयाँ चेतना, साहस र विद्रोहको भावना जन्माउन सक्छ।बन्दुकको घाउ समयसँगै निको हुन सक्छ, तर गलत विचारले दिएको मानसिक चोट, अपमान र अविश्वास लामो समयसम्म रहिरहन सक्छ। त्यसैगरी, सही विचारले दिएको वैचारिक झट्काले मानिसलाई वर्षौंदेखि जकडिएको अन्धविश्वास, शोषण, अन्याय र दास मानसिकताबाट मुक्त हुन प्रेरित गर्न सक्छ।
बन्दुकको शक्ति बारुदमा हुन्छ, तर विचारको शक्ति तर्क, ज्ञान, चेतना र सत्यमा हुन्छ। बन्दुकले मानिसलाई केही समयका लागि डराउन सक्छ, तर विचारले मानिसलाई आफैँ सोच्न, प्रश्न गर्न र अन्यायविरुद्ध उभिन सिकाउँछ।
इतिहास साक्षी छ—संसारमा भएका ठूला सामाजिक, राजनीतिक र सांस्कृतिक परिवर्तनहरू केवल हतियारको बलमा भएका होइनन्। ती परिवर्तनका पछाडि चेतना, विचार, सिद्धान्त र संगठित जनताको सामूहिक शक्ति रहेको छ।त्यसैले विचारसँग डराउनेहरू प्रायः प्रश्न गर्ने चेतनालाई दबाउन खोज्छन्। उनीहरूलाई स्वतन्त्र सोचाइ मन पर्दैन, आलोचनात्मक दृष्टिकोण स्वीकार्य हुँदैन र सत्यको पक्षमा उठ्ने आवाज असह्य हुन्छ। किनकि विचारले मानिसलाई मौन बस्न होइन, सत्य खोज्न सिकाउँछस अन्धो अनुकरण गर्न होइन, तर्क गर्न सिकाउँछस अन्याय सहन होइन, त्यसविरुद्ध आवाज उठाउन प्रेरित गर्छ।
याद राखौँ—बन्दुकको गोलीले शरीरलाई निसाना बनाउँछ, विचारको गोलीले गलत मान्यता र शोषणकारी व्यवस्थाको जग हल्लाउँछ। बन्दुकको आवाज केही समयपछि शान्त हुन्छ, तर सत्य र न्यायमा आधारित विचार पुस्तौँसम्म जीवित रहन्छ।त्यसैले मेरो विश्वास छ—हातमा हतियार बोकेर होइन, मस्तिष्कमा ज्ञान, हृदयमा मानवता र व्यवहारमा क्रान्तिकारी चेतना बोकेर समाज परिवर्तनको बाटोमा अघि बढ्नुपर्छ।किनकि मानिसलाई पराजित गर्नु ठूलो कुरा होइन, मानिसको चेतना बदल्नु नै वास्तविक परिवर्तन हो।
— विचार नै परिवर्तनको सबैभन्दा ठूलो शक्ति हो।

