बार्षिलोना, स्पेन, दुर्गा शर्मा । उत्तर अफ्रिकास्थित स्पेनको स्वायत्त सहर सेउतामा मोरोक्कोबाट हजारौं आप्रवासीले एकैपटक प्रवेश गर्ने प्रयास गरेपछि स्पेन सरकारले सीमा सुरक्षामा सेना परिचालन गर्दै सुरक्षा व्यवस्था कडा बनाएको छ।
स्पेनी सञ्चारमाध्यमका अनुसार आप्रवासीहरूले समुद्रमा पौडी खेलेर, रबर ट्युबको सहारा लिएर तथा सीमा क्षेत्रमा रहेका अवरोध पार गर्दै स्पेनी भूभागमा प्रवेश गर्ने प्रयास गरेका हुन्। घटनापछि सीमा क्षेत्रमा राष्ट्रिय प्रहरी, सिभिल गार्ड र सैनिकको उपस्थिति उल्लेखनीय रूपमा बढाइएको छ।
अधिकारीहरूका अनुसार घटनामा समुद्रमा डुबेर कम्तीमा १५ जनाको मृत्यु भएको छ। समुद्रमा खोजी तथा उद्धार कार्य जारी रहेकाले मृतकको संख्या अझ बढ्न सक्ने आशंका गरिएको छ।
सेउताका स्थानीय प्रशासनले केन्द्र सरकारसँग तत्काल सहयोगको माग गर्दै आप्रवासीको बढ्दो चापका कारण स्थानीय सेवा, अस्थायी आश्रय र सुरक्षा व्यवस्थापनमा कठिनाइ उत्पन्न भएको जनाएको छ। सीमा पार गर्नेहरूमध्ये उल्लेख्य संख्या नाबालिग रहेको बताइएको छ।
स्पेन सरकारले अवस्थालाई गम्भीर रूपमा लिँदै सेना, राष्ट्रिय प्रहरी र सिभिल गार्डलाई थप परिचालन गरेको छ। साथै, मोरोक्कोसँगको सीमा समन्वय र समुद्री उद्धार अभियानलाई पनि तीव्र बनाइएको छ।
उत्तर अफ्रिकामा अवस्थित सेउता मोरोक्कोसँग स्थल सीमा जोडिएको स्पेनको स्वायत्त सहर हो। युरोप प्रवेश गर्न खोज्ने आप्रवासीका लागि यो क्षेत्र लामो समयदेखि प्रमुख प्रवेशद्वारका रूपमा रहँदै आएको छ। पछिल्लो घटनाले स्पेनमा आप्रवासन, सीमा सुरक्षा र मानवीय व्यवस्थापनका विषयमा पुनः व्यापक बहस सुरु गराएको छ।
